Рӯнамоии китоби шашҷилдаи «Шашмақом»

26-уми ноябри соли равон дар донишгоҳ китоби шашҷилдаи «Шашмақом» рӯнамоӣ шуд. Дар ҳамоиш кормандони Академияи мақоми Тоҷикистон, ки китоби мазкур аз ҷониби онҳо таълиф гардидааст, таҳти роҳбарии Абдувалӣ Абдурашидов ширкат варзиданд. Ҳамчунин, нависандаи машҳур Абдулҳамид Самад, шоири маъруф Аскар Ҳаким ва як қатор адибони номвари мамлакат иштирок намуданд.

Чорабиниро декани факултаи филологияи тоҷик Боймурод Шарифзода ҳусни оғоз бахшида, пиромуни мазмун, муҳтаво ва мундариҷаи китоби шашҷилдаи «Шашмақом» маълумоти судманд ироа кард. Мавсуф, аз ҷумла, таъкид дошт, ки ин навъи мусиқии классикӣ иртиботманд танҳо ба миллати куҳанбунёду тамаддунофари тоҷик аст ва моро мебояд, ки насли хешро ҳанӯз аз наврасию ҷавонӣ бо оҳангҳои марғуби «Шашмақом» тарбия намоем.

Носирҷон Салимӣ, ректори донишгоҳ, академик, зимни баромади хеш «Шашмақом»-ро яке аз арзишмандтарин китоб унвон карда, таълифи шаш ҷилди онро кори басо сангин, заҳматталаб ва пурмасъулият хонд. Ректор таъкид кард, ҷавононро лозим аст, ки бо фароҳам омадани имконият ҳатман ин китоби гаронарзишро мутолиа бикунанд. Дар идомаи ҷамъомад роҳбари Академияи мақоми Тоҷикистон                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                    Абдувалӣ Абдурашидов қайд намуд, ки мо соли 2013 мактаби шашмақомро ташкил кардем. Мақсади аз таъсиси ин мактаб дар он буд, ки китоби шашҷилдаи «Шашмақом»-ро такмил дода, ба итмом расонем. Муддати 12 сол ба ин кор муваффақ шудем. Шашмақом мисли забон аст ва онро бояд эҳтиёт кунем, зеро он пояи мусиқист.

Шоири маъруфи тоҷик Аскар Ҳаким ҳангоми баромади хеш иброз дошт,  ки чанд рӯзе бемор буд ва худро бо мусиқии шашмақом табобат кардааст. Мавсуф ба Академияи шашмақом барои таълифи китоби пурмуҳтаво арзи сипос намуд.

Нависанда Абдулҳамид Самад зикр кард, ки шашмақом ба адабиёти классикии мо пайванд аст ва сарвати миллии тоҷикон маҳсуб меёбад. Дар рафти чорабинӣ намояндагони ансамбли мақом бо суруд ва мусиқиҳои дилнишин рӯҳу табъи иштирокчиёнро болида гардониданд.

Ҳоҷиакбар Ҳайдаров, донишҷӯи соли 4-уми факултаи филологияи тоҷик