Чуноне ки огоҳем, 16 ноябри соли 2018 барои ҳар як сокини Тоҷикистону тоҷикистонӣ рўзи таърихӣ ва фаромўшнашаванда мебошад. Маҳз дар ҳамин рўз агрегати аввали НБО-и Роғун фаъол мегардад, ки ин барои тоҷикон фараҳбахштарин воқеа ба ҳисоб меравад. Миллати тоҷик ин рўзро солҳо интизорӣ мекашид. Оғози корҳои сохтмонӣ дар ин иншооти миҳиму зарурӣ ҳанўз аз даврони собиқ Иттиҳоди Шўравӣ оғоз гардида буданд, аммо бо сабабҳои гуногун он идома наёфту бо ҳамин корҳо дар ин иншоот қатъ гардида буданд.            Баъди соҳибистиқлолии тоҷикон бо саъю талошҳои шабонарўзӣ ва кўшишҳои бевоситаи Асосгузори сулҳу ваҳдати миллӣ, Пешвои муаззами миллат, Президенти Тоҷикистон муҳтарам Эмомалӣ Раҳмон сохтмони НБО-и Роғун аз нав оғоз гардид ва тамоми мардуми мамлакат ин навидро хеле хуш пазируфтанд.

Ҳамгон хуб медонанд, ки ба фаъолият оғоз намудани НБО-и Роғун барои рушди тамоми соҳаҳои мамлакат аҳамияти басо калон дорад. Дигар ин ки, бо ба кор даромадани ин иншоот яке аз ҳадафҳои стратегии мамлакат- расидан ба истиқлолияти энергетикӣ таъмин мегардад ва аҳолии мамлакат на танҳо аз норасоии барқ танқисӣ намекашад, балки зиндагии беҳтару хубтарро соҳиб мегардад.

Бояд зикр кард, барои анҷом додани корҳои сохтмонӣ дар НБО-и Роғун мушкилиҳои зиёде ҷой доштанд, аммо ҳамаи инро сиёсати хирадмандонаи Пешвои муаззами миллат, Сарвари оқилу дурандеш- Эмомалӣ Раҳмон тавонист бартараф карда, ба идомаи ин иншооти бузурги аср асос гузорад.

Дар хусуси ояндаи дурахшони тоҷикону тоҷикистониён баъди ифтитоҳи пурраи ин нерўгоҳи тақдирсоз ҳаминро бояд зикр кард, ки таъсири мусбии ин иншоот дар баланд бардоштани сатҳи зиндагии мардум ва расидан ба мақсадҳои наҷиби Давлату Ҳукумати Тоҷикистон нақши созгор дошта метавонад. Дигар ин ки, мо на танҳо кишвари худро бо барқ пурра таъмин менамоем, инчунин метавонем онро содирот намуда, кишварҳои ҳамсояи худро бо барқи хушсифату аз ҷиҳати экологӣ тоза таъмин намоем.