Ба воситаи шабакат интернетӣ як нафар бонуи тоҷик, саҳеҳтараш собиқ рўзноманигори фирорӣ – бону Ҳумайро Бахтиёр нигоштааст, ки ўро барои бар зидди сохти давлатдории имрўзаи Тоҷикистион баромадҳо омода намуданаш аз кор сабукдўш намудаанд, лекин худро бегуноҳ меҳисобад.

Ин бонуи муҳтарам аввал бояд ба худ савол медод, ки Ҳукумату Давлати точикон ба ў чӣ бадӣ карда буд, нисбаташ чунин баромадҳоро раво дидааст? Оё, ҳамчун рўзноманигор, боре андешид, ки Тоҷикистон дар кадом вазъ қарор дошту мардумаш чӣ ҳол доштанд? Магар ҳамин Сарвару ҳамин Ҳукумат набуд, ки миллати тоҷикро аз вартаи нобудшавӣ раҳоӣ бахшид?...

Ин ва чандин саволҳои дигар касро ба андеша мебаранд. Давлате, ки туро хононд, соҳибмаълумот кард, соҳиби ҷойи кор намуд, то зиндагиатро пеш барӣ акнун низими давлатдориаш  ба ту писанд нест? Чаро? Барои он ки ту бар муқобилаш сухан мгўиву ба воситаи расонаҳои хабарӣ дигаронро бар зидди ин давлату ин миллат мешўронӣ. Барои он ки ту пойбанди ҳирсу ғурур гардидаиву худро аз дигарон доно меҳисобӣ.

Дар мақола зикр гардидааст, ки дар Тоҷикистон ягон хел озодӣ, аз он ҷумла «озодии сухан» нест.Ммуҳтарама Ҳумайро Бахтиёр шумо мафҳуми «озодии сухан» ё «озодии баён»-ро чи тавр мефаҳмед? Дар кадом давлати дунё камбудиву норасоиҳо вуҷуд надоранд? Магар барои ба миён омадани кулли чунин камбудиҳо Давлату Ҳукумат айбдоранд? На, хато мекунӣ. Баръакс, ҳар як Давлат кўшиш менамояд, ки камбудӣ-проблемаҳои бамиёномадаро саривақт ҳаллу фасл намояду таъсираш ба дигар қишрҳои ҷомеа нагузаранд. Аммо шумо ҳамчун рўзноманигор проблемаву камбудиҳои аз тарафи шахсе ё гурўҳе бамиёномадаро дар низоми нодурусти давлатдорӣ ҳисобида, бо ин роҳ мехостед дар байни мардум нисбат ин давлату ин миллат иғвоангезӣ кунед. Магар чунин рафтор ба як нафар рўзноманигоре, ки Давлату Ҳукумат ўро соҳибмаълумот гардонидааст, ҷоиз аст? Ҳаргиз не.

Имрўз Тоҷикистони соҳибистиқлол бо роҳбарии Сарвари оқилу хирадманд ва ғамхору меҳрубонаш хеле хуб рушд ёфта истодаасту мардумаш дар фазои тинҷу ором ва шукргузорӣ аз чунин Давлату чунин Сарвар хушу хурсандона зиндагиву фаъолият намуда истодаанд. Ин беҳтарин неъмат аст ва ба қадри он бояд расид.