Ҳамасола якшанбеи ҳафтаи аввали моҳи октябр дар Тоҷикистон Рӯзи омӯзгор таҷлил мегардад. Воқеан омӯзгор ҳамчун чеҳраи воқеии миллат шинохта мешавад, таълиму тарбияи насли наврас ва рушди соҳаи маориф ба ин чеҳраи мунавварфикр вобаста аст. Ҳар қадар омӯзгор бо донишҳои нави замонавӣ мусаллаҳ бошад, ҳамон қадар давлат пеш меравад ва аз дастовардҳои илмии омӯзгорон махзани илми мамлакат пурбор мешавад, дар ҷодаи мактабу маориф навгониҳои тоза ба миён меояд. Зеро ҳеҷ кишваре қодир нест, ки бе мактабу маориф пеш равад, рушд кунад ва ба муваффақиятҳои назаррас ноил шавад. Ба ин хотир, соҳаи мактабу маориф ва фаъолияти омӯзгор дар саргаҳи афкори сарвари давлат қарор дошта, пайваста барои ҳалли масъалаҳои мубрами соҳа чорасозӣ мешавад. Қабули ду стратегия ва амалисозии ҳашт барномаи давлатӣ дар соҳаи маориф далели ин гуфтаҳост. Илова бар ин, 19%-и буҷаи солонаи ҷумҳурӣ, ки 7,2 миллиард сомониро ташкил медиҳад, ба соҳаи маориф марбут аст.

Имрӯз дар Донишгоҳи давлатии омӯзгории Тоҷикистон ба номи Садриддин Айнӣ бо иштироки ҳунармандони Театри давлатии академии драмавии ба номи Абулқосим Лоҳутӣ намоишномаи театрии «Баъди ҷанг» пешкаши аҳли раёсат, омӯзгорон, кормандон ва донишҷӯён гардид.