ҶАМЪБАСТИ ОЗМУНҲОИ "ҲОЗИРҶАВОБОН" ВА МАҚОЛАИ БЕҲТАРИН ТАҲТИ УНВОНИ “ МАКТАБИ ДАВЛАТСОЗИИ ПЕШВОИ МИЛЛАТ, МУҲТАРАМ ЭМОМАЛӢ РАҲМОН”

Дар Донишгоҳи давлатии омӯзгории Тоҷикистон ба номи Садриддин Айнӣ бахшида ба 30-солагии Иҷлосияи XVI Шурои Олӣ ва Рӯзи Президенти Ҷумҳурии Тоҷикистон бо ибтикори шуъбаи кор бо ҷавонон ду озмуни донишгоҳӣ: мақолаи беҳтарин таҳти унвони “ Мактаби давлатсозии Пешвои миллат, муҳтарам Эмомалӣ Раҳмон” ва "Ҳозирҷавобон" эълон шуда буд, ки дар арафаи ҷашнҳои зикшуда ҷамъбаст гардид. Натиҷаи ин озмунҳо дар ҷаласаи тантанавӣ, ки бахшида ба Рӯзи байналмилалии донишҷӯён дар таърихи 17 ноябри соли 2022 баргузор шуд, эълон ва ғолибон муаррифӣ гардиданд. Дар раванди ҷамъомад муовини ректори Донишгоҳ оид ба корҳои илмӣ, профессор Сангинзод Д.Ш. ба ғолибон сипоснома, ифтихорнома, диплом ва мукофотҳои пулиро тақдим намуда, аз номи Раёсати донишгоҳ, хосатан ректори он, профессор Аҳлиддин Ибодуллозода онҳоро табрик намуд. Тибқи қарордоди ҳакамон дастаҳои зерин чун ғолибони озмуни "Ҳозирҷавобон" эътироф гардиданд: дастаи "Забондон"-и факултети забони англисӣ ва забонҳои Шарқ сазовори ҷойи якум бо дипломи дараҷаи 1 ва мукофотпулӣ, дастаи "Иқтисоддони ҷавон"- и факултети иқтисод ва идора сазовори ҷойи дуюм бо дипломи дараҷаи 2 ва мукофотпулӣ, дастаҳои "Ҷило"-и факултети филологияи тоҷик ва "Технологони ҷавон"-и факултети технология сазовори ҷойи сеюм бо дипломи дараҷаи 3 ва мукофотпулӣ қадрдонӣ гардиданд.

ТАҶЛИЛИ РӮЗИ БАЙНАЛМИЛАЛИИ ДОНИШҶӮЁН

Бо дастури Раёсати Донишгоҳи давлатии омӯзгории Тоҷикистон ба номи Садриддин Айнӣ ва ибтикори Шуъбаи кор бо ҷавонон ҳамроҳ бо Кумитаи иттифоқҳои касабаи донишҷӯён имрӯз дар заминаи Рӯзи байналмилалии донишҷӯён (International Students’ Day) ҷаласаи тантанавӣ баргузор гардид. Дар ибтидо муовини ректор оид ба корҳои илмӣ, профессор Сангинзод Д. Ш. донишҷӯёнро аз номи Раёсати донишгоҳ, хоссатан ректори он, профессор Аҳлиддин Ибодуллозода табрик намуда, сипас дар боби таърихи ин ҷашн чанд ҳарф ироа намуд. Мавсуф зикр намуд, ки дар айни замон зиёда аз 40 ҳазор нафар донишҷӯёни тоҷик аз рӯи ихтисосҳои барои кишвар зарур дар 38 кишвари ҷаҳон таҳсил менамоянд. Ҳукумати мамлакат дар замони соҳибистиқлолӣ ба хотири таъмин намудани шароити мусоиди таълиму тарбия ва зиндагии шоистаи наврасону ҷавонон – насли ояндасози миллат ва Ватани азизамон – Тоҷикистон тамоми тадбирҳои заруриро амалӣ гардонида, ин равандро бомаром идома дода истодааст. Ҳамин аст, ки ҷавонони мамлакат на танҳо дар дохили кишвар, балки берун аз он ҳам таҳсили илм менамоянд.

РЕКТОР: ОЛИМПИАДАҲОИ ДОХИЛИДОНИШГОҲӢ ОМИЛИ ДАРЁФТИ ДОНИШҶӮЁНИ БОЛАЁҚАТ

Бо мақсади рушду инкишофи илму маърифат ва ҷалби бештари донишҷӯён ба илмомӯзиву азбар намудани донишҳои замонавӣ ректори Донишгоҳ тасмим гирифт, ки олимпиадаи фаннии дохилидонишгоҳиро дар миёни донишҷӯёни 14 факултети Донишгоҳ баргузор намояд.

Олимпиадаи дохилидонишгоҳии мазкур аз рӯи 14 фан, аз ҷумла забон ва адабиёти тоҷик, забон ва адабиёти рус, забони англисӣ, таърих, фалсафа, сиёсатшиносӣ, математика, физика, химия, биология, экология, география, назарияи иқтисодӣ ва технологияҳои иттилоотӣ дар факултетҳои Донишгоҳ баргузор шуда истодааст.

Маврид ба зикр аст, ки ғолибони ҷойҳои ифтихорӣ бо диплом ва ифтихорномаи раёсати Донишгоҳи давлатии омӯзгории Тоҷикистон ба номи Садриддин Айнӣ қадрдонӣ карда мешаванд.

ДАРСИ КУШОД БА МУНОСИБАТИ РӮЗИ ПАРЧАМ

Бо ибтикори муаллими калони кафедраи физикаи эксперименталии Донишгоҳи давлатии омӯзгории Тоҷикистон ба номи Садриддин Айнӣ Алишери З. дар таърихи 18-уми ноябри соли 2022 бахшида ба Рӯзи Парчами давлатии Ҷумҳурии Тоҷикистон дарси кушоди тарбиявӣ баргузор гардид. Дар дарси мазкур раиси Шурои кураторони Донишгоҳ Сатторов Н., декани факултет Назруллоев А., муовини декан оид ба корҳои тарбиявӣ Ниёзов С., мудири кафедраи физикаи эксперименталӣ Муҳаббатов Х. ва як зумра устодону донишҷӯён иштирок намуданд. Донишҷӯён доир ба Парчами давлатии Ҷумҳурии Тоҷикистон маърӯза карда, аз ҷумла зикр намуданд, ки парчам аз ҷумлаи рамзҳои асосии ҳар як давлат буда, нишонаи соҳибихтиёрӣ ва соҳибистиқлолии ҳамон давлату миллат маҳсуб мешавад. Воқеан, Парчам дар фаъолияти давлатдорӣ, аз он ҷумла, дар гузаронидани чорабиниҳои расмию ғайрирасмии сиёсию фарҳангӣ, варзишӣ, ҳамчунин дар муносибатҳои байналмилалӣ ва дар ҳаёти ҳаррӯзаи ҳар як фарди ҷомеа мавқеъ ва нақши хоси худро доро мебошад.

ҶАМЪБАСТИ ДАВРИ АВВАЛИ  КУРС – ТРЕНИНГ

Дар доираи ҳамкориҳои судманди Маркази такмили ихтисос ва бозомӯзии кадрҳои Донишгоҳи давлатии омӯзгории  Тоҷикистон ба номи Садриддин Айнӣ  ва ташкилоти ҷамъиятии “Дурахши маърифат” дар доираи лоиҳаи “Забони англисӣ бидуни сарҳадҳо” барои омӯзгорони фанни забони англисӣ дар се давра курс-тренинг ба нақша гирифта шудааст, ки баргузории даври аввали он  аз 14-ум то 16 – уми ноябри соли 2022 пешбинӣ гардида буд, ҷамъбаст гардид. Дар маросими ҷамъбасти даври якуми курс-тренинг муовини ректори донишгоҳ  оид ба корҳои илмӣ, профессор Сангинзод Д.Ш., сардори Маркази такмили ихтисос ва бозомӯзии кадрҳо Азимов М., директори ташкилоти ҷамъиятии “Дурахши маърифат” Мирпочоева Н. ва  менеҷери барнома Мирзовафоева Г. иштирок намуда, ба иштирокчиёне, ки талаботи нақшаи пешбинишударо пурра аз худ намудаанд, шаҳодатномаи хатми курс  тақдим карданд.

АРҶГУЗОРӢ БА САНАИ МУҲИМИ ТАЪРИХӢ

Дар таърихи 16-уми ноябри соли 2022 дар факултети филологияи тоҷики ДДОТ ба номи Садриддин Айнӣ бахшида ба Рӯзи Президент ва 30-солагии Иҷлосияи 16-уми Шурои Олии Ҷумҳурии Тоҷикистон чорабинӣ баргузор гардид. Дар чорабинӣ муовинони ректор оид ба корҳои таълимӣ, дотсент Айнулозода Наҳтулло, муовини ректор оид ба корҳои илмӣ, профессор Сангинзод Дониёр, сардори маркази бақайдгширӣ, машваратӣ ва ягонаи тестӣ, дотсент Назаров Давлатхон, садорат ва устодону донишҷӯёни факултет иштирок намуданд. Дотсент Айнулозода Наҳтулло, профессор Сангинзод Дониёр ва профессор Восиева Рухшона перомуни паҳлуҳои гуногуни Иҷлосияи 16-уми Шурои Олии Ҷумҳурии Тоҷикистон ва нақши ин санаи муҳими тақдирсоз барои миллати тоҷик, мақсад ва муҳтавои гиромидошти Рӯзи Президент сухан ронда, андешаҳои ҷолиб ироа намуданд.

ТАҶЛИЛИ РӮЗИ ПРЕЗИДЕНТ ДАР ФАКУЛТЕТ

Дар факултети географияи Донишгоҳи давлатии омӯзгории Тоҷикистон ба номи Садриддин Айнӣ бахшида ба 30-солагии Иҷлосияи 16-уми Шурои Олии Ҷумҳурии Тоҷикистон ва Рӯзи Президенти Ҷумҳурии Тоҷикистон чорабинии фарҳангӣ-фароғатӣ баргузор гардид. Дар чорабинӣ раиси шурои кураторон Н. Сатторов, мудири шуъбаи кор бо ҷавонон Д. Каримов, раиси иттифоқи касабаи донишҷӯён Д. Раҷабов, мудири шуъбаи таҳлил ва робита бо ҷомеа Ш. Алланазаров, раиси шурои занон М. Давлатзода, садорати факултет ва устодону донишҷӯён иштирок намуданд. Чорабиниро декани факултет А. Қаландаров ифтитоҳ намуда, роҷеъ ба аҳамияти Иҷлосияи 16-ум дар бунёди давлати навини тоҷикон изҳори андеша намуд.