15-уми феврали соли 2024 миёни Донишгоҳи давлатии омӯзгории Тоҷикистон ба номи Садриддин Айнӣ ва Донишкадаи давлатии омӯзгории Шаҳрисабзи Ҷумҳурии Ӯзбекистон созишномаи ҳамкорӣ ба таври маҷозӣ баста шуд. Ҳуҷҷати ҳамкорӣ аз тарафи ректори Донишгоҳи давлатии омӯзгории Тоҷикистон ба номи Садриддин Айнӣ профессор Ибодуллозода Аҳлиддин ва ректори Донишкадаи давлатии омӯзгории Шаҳрисабз Шоназаров Ҷамшед Шуҳратович дар шакли маҷозӣ ба имзо расонида шуд.

Ҳоло тибқи бандҳои созишномаи мазкур рушди табодули таҷрибаомӯзии омӯзгорон ва ба таҳсил фарогирии донишҷӯён, фаъолияти муштараки илмӣ, ташкил ва баргузор намудани конференсияҳо, ба роҳ мондани нашри маводи илмӣ ва дигар фаъолияти муҳимми илмӣ-фарҳангӣ, ки ба манфиати ҷонибҳо мебошад, роҳандозӣ карда мешавад.

Маврид ба зикр аст, ки Донишгоҳи давлатии омӯзгории Тоҷикистон ба номи Садриддин Айнӣ феълан ҳамкориҳои судмандро бо 111 муассисаҳои олӣ ва олии касбии ватаниву хориҷӣ дар самти илмиву таълимӣ ва мубодилавию фарҳангӣ ба роҳ монда, тасмим дорад, ки дар оянда ҳамкориро бо муассисаҳои бонуфузи дунё тавсеа бахшад.