Боздид аз сардхонаҳо, анбори захираи маҳсулот ва фаъолияти коргоҳи

истеҳсоли маҳсулоти қаннодӣ аз мева дар деҳоти Ошобаи ноҳияи Ашт

15.09.2020 11:08, ноҳияи Ашт

15 сентябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳоти Ошобаи ноҳияи Ашти вилояти Суғд Корхонаи истеҳсолии Ҷамъияти дорои масъулияти маҳдуди “АГРОАШТ” ва 2 сардхонаи навбунёдро, ки бо саҳми соҳибкори ватанӣ Бахтиёр Мақсудҷонов сохта шудааст, мавриди истифода қарор доданд.

Нахуст Пешвои муаззами миллат дар маросими ба фаъолият пардохтани корхонаи навтаъсис, ки самти фаъолияти он ба истеҳсоли маҳсулоти қаннодӣ аз ду навъи мева, тар ва хушк равона шудааст, ширкат варзиданд.

Корхонаи истеҳсолии “АГРОАШТ” дар паҳлуи сардхона таъсис дода шуда, беш аз 10 намуди маҳсулоти қаннодӣ, аз қабили қиёми зардолу, олу, ангур, каду, нок, себи биҳӣ, анҷир ва ғайра истеҳсол мекунад.

Боздид аз токзори навбунёд ва боғи интенсивӣ дар

хоҷагии деҳқонии “Олами ангур” дар ноҳияи Ашт

15.09.2020 11:06, ноҳияи Ашт

15 сентябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ ба ноҳияи Ашт дар деҳоти Ошоба аз токзори навбунёд ва боғи интенсивӣ дар хоҷагии деҳқонии “Олами ангур” боздид намуданд.

Токзор ва боғи интенсивӣ дар ноҳияи Ашт аз ҷониби бародарон - соҳибкорон - Зайналобиддин, Толибҷон ва Бахтиёр Махсудҷоновҳо дар доираи дастуру ҳидоятҳои ҳамешагии Сарвари давлат муҳтарам Эмомалӣ Раҳмон дар самти истифодаи мақсадноку пурсамари замин ва ба гардиш даровардани заминҳои бекорхобида бунёд карда шудааст.

Истиқбол дар шаҳраки Шайдон ва ифтитоҳи майдони Парчами давлатӣ дар ноҳияи Ашт

15.09.2020 09:15, ноҳияи Ашт

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пас аз ифтитоҳи бинои нави Муассисаи таҳсилоти миёнаи умумии рақами 36 дар деҳоти Понғоз ба маркази ноҳияи Ашт - шаҳраки Шайдон ташриф оварданд.

Шаҳраки Шайдони ноҳияи Ашт дар давоми 29-соли Истиқлоли давлатӣ дар доираи вусъати тадбирҳои ободонию созандагӣ бо пуштибонии ҳамаҷонибаи сокинонаш аз сиёсати бунёдкоронаи давлату Ҳукумати Ҷумҳурии Тоҷикистон хеле ободу зебо гардида, сатҳу сифати зиндагии мардум ба марҳилаи сифатан нав баромадааст.

Президенти Ҷумҳурии Тоҷикистон муҳтарам Эмомалӣ Раҳмон дар маркази ноҳияи Ашт - шаҳраки Шайдон майдони Парчами давлатиро ба истифода дода, дар он ин рамзи муаррификунандаи давлату миллат дар арсаи байналмилалиро парафшон намуданд.

Оғози сафари корӣ дар ноҳияи Ашт ва ифтитоҳи бинои

Муассисаи таҳсилоти миёнаи умумии рақами 36-и деҳоти Понғоз

15.09.2020 09:14, ноҳияи Ашт

15 сентябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ дар шаҳру ноҳияҳои вилояти Суғд ба ноҳияи Ашт ташриф оварданд.

Меҳмони воломақом - Пешвои миллат муҳтарам Эмомалӣ Раҳмонро дар деҳоти Понғоз роҳбарияти ноҳия ва сокинон бо шукргузорӣ аз дастовардҳои даврони соҳибистиқлолии Ватан самимона истиқбол гирифтанд.

Президенти мамлакат муҳтарам Эмомалӣ Раҳмон дар деҳоти Понғоз бинои нави Муассисаи таҳсилоти миёнаи умумии рақами 36-ро мавриди истифода қарор доданд.

Суханронӣ дар маросими ифтитоҳи варзишгоҳ дар ноҳияи Мастчоҳи вилояти Суғд

14.09.2020 20:03, ноҳияи Мастчоҳ

Ҳамватанони азиз!

Ҳозирини гиромӣ!

Ҳамаи шумо ва кулли сокинони сарбаланди вилояти Суғдро бори дигар ба ифтихори бисту нӯҳумин солгарди истиқлоли давлатии Ҷумҳурии Тоҷикистон самимона табрик мегӯям.

Мехоҳам бо қаноатмандӣ иброз намоям, ки сокинони вилоят, аз ҷумла мардуми ноҳияи Мастчоҳ ин ҷашни барои ҳар шаҳрванди ватандӯсти Тоҷикистон муқаддасу азизро дар баробари тамоми мардуми кишвар бо омодагии шоиста ва дастовардҳои арзанда таҷлил намуданд.

Мо ин падидаи некро давоми чанд рӯзи сафари корӣ ба шаҳру ноҳияҳои вилояти Суғд мушоҳида кардем. Мардуми заҳматкаши вилоят тавассути татбиқи самараноки сиёсати давлат ва Ҳукумати мамлакат дар самти корҳои ободонӣ иқдомҳои хеле назаррасро ба анҷом расонидаанд.

Ва ҳоло дар вилоят раванди ободониву созандагӣ ба хотири истиқболи ҷашни муқаддасу бузурги халқамон - сисолагии истиқлоли давлатӣ босуръат идома дорад.

Ифтитоҳи Варзишгоҳи марказии ноҳияи Мастчоҳ бо 10 ҳазор ҷойи

нишаст ва мулоқот бо сокинону фаъолони ноҳия

14.09.2020 20:01, ноҳияи Мастчоҳ

Дар ноҳияи Мастчоҳ Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Варзишгоҳи марказии ноҳияро бо 10 ҳазор ҷойи нишаст ифтитоҳ карда, дар ҳамин ҷо бо роҳбарон ва фаъолону сокинони ноҳия мулоқот карданд.

Майдони умумии варзишгоҳ 3,2 гектарро ташкил дода, корҳои сохтмонӣ дар он аз соли 2016 оғоз гардида буд.

Варзишгоҳ дар шаҳраки Бӯстон бо маблағгузории Дирексияи сохтмони иншоотҳои ҳукуматии Дастгоҳи иҷроияи Президенти Ҷумҳурии Тоҷикистон аз тарафи пудратчиён Ҷамъияти дорои масъулияти маҳдуди “Сохтмон”, “Темурҷон” ва “Эъҷози ҳунар” сохта шуд.

Варзишгоҳ аз чор минбари нишастгоҳ ва ҳамчунин барои меҳмонони олиқадр ҷойи махсус иборат аст.

Масоҳати майдон барои бозии футбол бо андозаҳои 105 метр бар 68 метр мебошад.

Ифтитоҳи қасри варзишии “Паҳлавонони суғдӣ” дар ноҳияи Мастчоҳ

14.09.2020 19:50, ноҳияи Мастчоҳ

Дар ноҳияи Мастчоҳ Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кӯчаи ба номи Ҷонмаҳмад Холиқови шаҳраки Бӯстон қасри варзишии “Паҳлавонони суғдӣ”-ро, ки аз рӯи лоиҳаи зебою замонавӣ бунёд шудааст, бо иштироки наврасону ҷавонон ва дӯстдорони варзишу тарбияи ҷисмонӣ мавриди истифода қарор доданд.

Бунёди қасри варзиш бо супориши Пешвои миллат муҳтарам Эмомалӣ Раҳмон бо мақсади фароҳам овардани шароити хуби машқу тамрин, эҳёву рушди намудҳои гуногуни варзиш, аз ҷумла гӯштин, гӯштини миллӣ, камарбандӣ, дзюдо, гӯштини самбо ва намудҳои дигари варзишӣ миллӣ ба роҳ монда шудааст.

Суханронӣ дар Қасри фарҳанги ноҳияи Мастчоҳи вилояти Суғд

14.09.2020 17:43, ноҳияи Мастчоҳ

Ҳозирини гиромӣ!

Дар оғози сухан ҳамаи шумо – намояндагони мардуми сарбаланду меҳмоннавоз, бонангу номус ва созандаву ободкори ноҳияи Мастчоҳро ба муносибати бисту нӯҳумин солгарди истиқлоли давлатии Ҷумҳурии Тоҷикистон, ҳамчунин, ҷашни фархундаи 5500 - солагии Саразми бостонӣ, ки бо қарори ЮНЕСКО таҷлил гардида, нишонаи таърихи бостонии халқи тоҷик ба ҳисоб меравад, табрик мегӯям.

Воқеан истиқлолу озодӣ олитарин ва бузургтарин дастоварди мардуми тамаддунсозу фарҳангии мо буда, ҳамчун машъали фурӯзон роҳи моро ба сӯи фардои ободи Тоҷикистони азизамон равшану пурнур месозад.

Маҳз истиқлолу соҳибихтиёрӣ ба мову шумо имконият фароҳам овард, ки таърих, забон ва фарҳанги халқи худро ба таври шоиста қадрдонӣ кунем, анъанаву ойинҳои миллатамонро эҳё намоем, санаҳои таърихӣ ва шахсиятҳои бузурги халқамонро гиромӣ дошта, мероси бузурги маънавии гузаштагонро дар хизмати ҷомеа гузорем ва барои тарбияи наслҳои ояндасоз равона созем.