ПАРЧАМ – ШАҲОДАТНОМАИ МИЛЛАТ

Дар таърихи  24- ноябри соли 2022  бахшида ба рӯзи Парчами Ҷумҳурии Тоҷикистон бо ибтикори кафедраи хизматрасонии иҷтимоӣ, маданӣ ва туризми  факултети географияи Донишгоҳи давлатии омӯзгории Тоҷикистон ба номи Садриддин Айнӣ бахшида ба рӯзи Парчами давлатӣ дарси кушоди тарбиявӣ доир гардид. Дар дарси мазкур мудири кафедраи мазкур, дотсент Самиев А.М., муовини декан оид ба илм, дотсент  Имомов А., кураторон Собиров М.С. ва Мусоев Д. иштирок доштанд.  Мудири кафедра дотсент Самиев А.  қайд кард, ки  Парчам, Нишон ва Суруди миллӣ рамзҳои асосии ҳар як давлат буда, нишонаи соҳибихтиёрӣ ва соҳибистиқлолии ҳамон давлату миллат маҳсуб мешаванд. Воқеан, Парчам дар фаъолияти давлатдорӣ, аз он ҷумла, дар гузаронидани чорабиниҳои расмию ғайрирасмии сиёсию фарҳангӣ, варзишӣ, ҳамчунин дар муносибатҳои байналмилалӣ ва дар ҳаёти ҳаррӯзаи ҳар як фарди ҷомеа мавқеъ ва нақши хоси худро доро мебошад.

БАРРАСИИ МУНОСИБАТИ БОСАЛОҲИЯТ БА ТАЪЛИМ

Дар Донишгоҳи давлатии омӯзгории Тоҷикистон ба номи Садриддин Айнӣ бо ибтикори садорати факултети физика бахшида ба амалигардонии барномаи “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф (солҳои 2020-2040)” конференсияи илмӣ-методии ҷумҳуриявӣ таҳти унвони “Проблемаҳои татбиқи муносибати босалоҳият дар таълими фанҳои табиӣ-математикӣ дар муассисаҳои таҳсилоти миёнаи умумӣ ва миёнаву олии касбӣ” Дар таърихи 19-уми ноябри соли 2022 баргузор  гардид. Ҳамоиши илмии мазкурро муовини ректор оид ба корҳои илмӣ, профессор Дониёр Сангинзод ифтитоҳ карда, аз номи ректори Донишгоҳ, профессор Аҳлиддин Ибодуллозода иштирокчиёни конференсияро хайрамақдам намуд. Мавсуф зимни суханронии хеш иброз дошт, ки солҳои 2020 - 2040 аз тарафи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба хотири боз ҳам тақвият намудани омӯзиши илмҳои табиатшиносӣ, дақиқ ва риёзӣ инчунин, барои тавсеаи тафаккури техникии насли наврас ҳамчун “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” эълон шудааст.

ҲИМОЯИ РИСОЛАИ ИЛМӢ

Дар таърихи 19 ноябри соли 2022 дар ҷаласаи Шурои диссертатсионии 6D. KOA-47, ихтисосҳои 13.00.08-назария ва методикаи таҳсилоти касбӣ, 13.00.08.04- назария ва методикаи фанҳои гуманитарӣ, ки муддате қабл фаъолияти худро оғоз намуд, ҳимояи диссертатсияи Мавлонова Интизор Тоҷиддиновна, омӯзгори калони кафедраи методикаи забони англисӣ, барои дарёфти дараҷаи илмии номзади илмҳои педагогӣ, дар мавзӯи “Ташаккулёбии қобилияти коммуникативӣ-нутқии донишҷӯён дар раванди таҳсилоти олии касбии педагогӣ (дар асоси маводи омӯзиши забони англисӣ)” бомуваффақият анҷом пазируфт. Лозим ба зикр аст, ки бахши тайёр кардани кадрҳои илмӣ ва илмӣ-педагогӣ дар самти ҳимояи рисолаҳои илмӣ корҳои назаррасеро ба анҷом расонида истодааст, ки ҳимояи рисолаи зикршуда намунае аз ин крҳо маҳсуб меёбад.

ДАСТАИ БЕҲТАРИН СОҲИБИ "ҶОМИ РЕКТОРИ ДОНИШГОҲ" ШУД

Дар Донишгоҳи давлатии омӯзгории Тоҷикистон ба номи Садриддин Айнӣ мусобиқаи футболи хурд, ки ба муносибати Рӯзи Кониститутсия ва 30-солагии иҷлосияи 16-уми Шурои Олии Ҷумҳурии Тоҷикистон миёни омӯзгорону кормандон оғоз гардида буд, анҷом ёфт.
Маврид ба зикр аст, ки 15 даста дар сабқати мазкур баҳри дарёфти “Ҷоми ректори Донишгоҳ” бо ҳам рақобат намуда, 3 даста сазовори ҷойҳои ифтихорӣ, аз ҷумла факултети математика ва информатика сазовори ҷаи 1-ум, факултети иқтисод ва идоракунӣ дар соҳаи маориф сазовори ҷои 2-ум ва дастаи раёсати Донишгоҳ сазовори ҷои 3-юм дониста шуда, аз ҷониби раёсати Донишгоҳ дастаҳоим ғолиб бо мукофотҳои пулӣ қадрдонӣ гардиданд.

ҶАМЪБАСТИ ОЗМУНҲОИ "ҲОЗИРҶАВОБОН" ВА МАҚОЛАИ БЕҲТАРИН ТАҲТИ УНВОНИ “ МАКТАБИ ДАВЛАТСОЗИИ ПЕШВОИ МИЛЛАТ, МУҲТАРАМ ЭМОМАЛӢ РАҲМОН”

Дар Донишгоҳи давлатии омӯзгории Тоҷикистон ба номи Садриддин Айнӣ бахшида ба 30-солагии Иҷлосияи XVI Шурои Олӣ ва Рӯзи Президенти Ҷумҳурии Тоҷикистон бо ибтикори шуъбаи кор бо ҷавонон ду озмуни донишгоҳӣ: мақолаи беҳтарин таҳти унвони “ Мактаби давлатсозии Пешвои миллат, муҳтарам Эмомалӣ Раҳмон” ва "Ҳозирҷавобон" эълон шуда буд, ки дар арафаи ҷашнҳои зикшуда ҷамъбаст гардид. Натиҷаи ин озмунҳо дар ҷаласаи тантанавӣ, ки бахшида ба Рӯзи байналмилалии донишҷӯён дар таърихи 17 ноябри соли 2022 баргузор шуд, эълон ва ғолибон муаррифӣ гардиданд. Дар раванди ҷамъомад муовини ректори Донишгоҳ оид ба корҳои илмӣ, профессор Сангинзод Д.Ш. ба ғолибон сипоснома, ифтихорнома, диплом ва мукофотҳои пулиро тақдим намуда, аз номи Раёсати донишгоҳ, хосатан ректори он, профессор Аҳлиддин Ибодуллозода онҳоро табрик намуд. Тибқи қарордоди ҳакамон дастаҳои зерин чун ғолибони озмуни "Ҳозирҷавобон" эътироф гардиданд: дастаи "Забондон"-и факултети забони англисӣ ва забонҳои Шарқ сазовори ҷойи якум бо дипломи дараҷаи 1 ва мукофотпулӣ, дастаи "Иқтисоддони ҷавон"- и факултети иқтисод ва идора сазовори ҷойи дуюм бо дипломи дараҷаи 2 ва мукофотпулӣ, дастаҳои "Ҷило"-и факултети филологияи тоҷик ва "Технологони ҷавон"-и факултети технология сазовори ҷойи сеюм бо дипломи дараҷаи 3 ва мукофотпулӣ қадрдонӣ гардиданд.

ТАҶЛИЛИ РӮЗИ БАЙНАЛМИЛАЛИИ ДОНИШҶӮЁН

Бо дастури Раёсати Донишгоҳи давлатии омӯзгории Тоҷикистон ба номи Садриддин Айнӣ ва ибтикори Шуъбаи кор бо ҷавонон ҳамроҳ бо Кумитаи иттифоқҳои касабаи донишҷӯён имрӯз дар заминаи Рӯзи байналмилалии донишҷӯён (International Students’ Day) ҷаласаи тантанавӣ баргузор гардид. Дар ибтидо муовини ректор оид ба корҳои илмӣ, профессор Сангинзод Д. Ш. донишҷӯёнро аз номи Раёсати донишгоҳ, хоссатан ректори он, профессор Аҳлиддин Ибодуллозода табрик намуда, сипас дар боби таърихи ин ҷашн чанд ҳарф ироа намуд. Мавсуф зикр намуд, ки дар айни замон зиёда аз 40 ҳазор нафар донишҷӯёни тоҷик аз рӯи ихтисосҳои барои кишвар зарур дар 38 кишвари ҷаҳон таҳсил менамоянд. Ҳукумати мамлакат дар замони соҳибистиқлолӣ ба хотири таъмин намудани шароити мусоиди таълиму тарбия ва зиндагии шоистаи наврасону ҷавонон – насли ояндасози миллат ва Ватани азизамон – Тоҷикистон тамоми тадбирҳои заруриро амалӣ гардонида, ин равандро бомаром идома дода истодааст. Ҳамин аст, ки ҷавонони мамлакат на танҳо дар дохили кишвар, балки берун аз он ҳам таҳсили илм менамоянд.