ШАНБЕГИИ ДАСТАҶАМЪОНА

Субҳи 17-уми сентябри соли ҷорӣ дар Донишгоҳи давлатии омӯзгории Тоҷикистон ба номи Садриддин Айнӣ бо мақсади тозаю озода нигоҳ доштани гирду атрофи донишгоҳ  ва сарсабзу хуррам гардонидани саҳни он шанбегӣ баргузор гардид.

ҲАР АМАЛИ ЗИШТЕРО ПОСУХЕСТ!

Дар сарҳади байни Тоҷикистон ва Қирғизистон боз хуни ноҳақ рехт, дар натиҷаи тирпарронии марзбонони қирғиз ду нафар сарҳадбонони тоҷик ҳалок ва беш аз 13 нафар захм бардоштанд. Аҳдшиканӣ, зери по намудани савганди низомӣ, ҳамсоянописандӣ, ифтихори хушку холӣ ва курнамакӣ барин хислатҳои манфури инсонӣ барои марзбонони қирғиз ва роҳбарияти он одати ҳамешагӣ шудааст. Чунин амалҳои зишт ва ғайриинсонии ҳамсояҳои қирғизро на танҳо мо, тоҷикон, балки халқи ҳамҷавори узбек ва мардуми қазоқ низ дар дарозои таърих шоҳид будаанд. Халқи бародари узбек ҳануз ҳодисаҳои даҳшатбори вилояти Ошро, ки дар натиҷаи он ҳазорҳо нафар зану кӯдак ва пирони барҷомандаи узбеки муқими вилояти Ош аз ҷониби гуруҳҳои миллатгаро ва хизматчиёти давлатии қирғиз ба ҳалокат расиданд, ҳеҷ гоҳ фаромӯш намекунанд.

КОРРУПСИЯ - МОНЕА ДАР РАВАНДИ РУШДИ КИШВАР

Дар асоси нақша-чорабинии ДДОТ ба номи С. Айнӣ оид ба татбиқи Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030 дар таърихи 15-уми сентябри соли 2022 мулоқоти намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон бо омӯзгорон ва кормандони донишгоҳ баргузор гардид. Ҷамъомади мазкурро муовини ректори донишгоҳ оид ба корҳои илмӣ, профессор Дониёр Сангинзод оғоз намуда, пиромуни ҷилавгирӣ аз аъмоли номатлуби коррупсинӣ изҳори андеша намуд. Сипас, подполковники адлия, сарнозири Раёсати муқовимат бо коррупсияи Агентии назорати молиявӣ ва мубориза бо коррупсияи назди Ҳукумати Ҷумҳурии Тоҷикистон Назриён Василбек Қурбон доир ба “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” баромад намуда, аз ҷумла таъкид кард, ки барои решакан кардани аъмоли коррупсионӣ танҳо мақомоти давлатӣ вазифадор нестанд. Дар ин ҷода бояд тамоми аҳолии кишвар камари ҳиммат банданд.

РЕКТОР: ИРТИБОТРО БО ВОЛИДАЙНИ ДОНИШҶӮЁН ҚАВӢ НАМОЕД!

Субҳи  имрӯз бо мақсади назорати вазъи интизоми бадарсоии донишҷӯён дар асоси дастури ректори Донишгоҳ Аҳлиддин Ибодуллозода дар назди даромадгоҳ рейди назоратӣ баргузор карда шуд. Рейди назоратии мазкур муайян намуд, ки зиёда аз 20 нафар омӯзгорону лаборантон ва баъзе аз мудирони кафедраҳо, инчунин иддае аз донишҷӯён дар вақти муқарраргардида ба дарс ҳозир намешуданд. Илова бар ин, баъзе аз донишҷӯён бо  сару либоси ғайрирасмиву риши дамида ва ҳатто бе ҷузвдон ҳозир мешуданд. Бемасъулиятӣ нисбат ба  дарс аз ҷониби донишҷӯён то дараҷае ба назар мерасид, ки қариб то ду соат ва зиёда аз ин ҳам ба дарсҳо дер меомаданд.

ОЗМУНИ ИХТИРОЪКОРОНИ МУАССИСАҲОИ ТАҲСИЛОТИ ОЛИРО ДАР ДОНИШГОҲ БАРГУЗОР МЕНАМОЕМ!

Имрӯз бо ибтикори Аҳлиддин Ибодуллозода дар саҳни даромадгоҳи бинои асосӣ намоиши дастовардҳои омӯзгорони Донишгоҳи давлатии омӯзгории Тоҷикистон ба номи Садриддин Айнӣ баргузор гардид. Дар намоиш аз ҷониби садорати 14 факултети донишгоҳ дастовардҳо, аз ҷумла китобҳои муфиди дарсии дар солҳои 2019 - 2022 таълифшуда, донишномаҳо, медалу ҷоизаҳои омӯзгорону донишҷӯён, ки дар озмуну олимпиадаҳои ҷумҳуриявию байналмилалӣ соҳиб шудаанд, шаҳодатномаҳо, диплому медалҳо ва патентҳое, ки барои ихтироъкорӣ ба даст овардаанд, рӯнамоӣ гардиданд. Ректори донишгоҳ зимни боздид иброз дошт, ки мақсад аз рӯнамоӣ-муаррифӣ намудани дастовардҳои донишгоҳ ва инчунин ташвиқи омӯзгорону олимон ба таълифи бештари китобҳои дарсӣ ва васоити таълимӣ, дарёфти ихтироъкорон, ҷалби омӯзгорону донишҷӯён ба навовариву ихтироъкорӣ мебошад.

БА ТОЗАГИВУ ОБОДОНӢ ДИҚҚАТ БОЯД ДОД

12-уми сентябри соли 2022 гурӯҳи кории қисми тарбия таҳти роҳбарии муовини ректор оид ба корҳои тарбиявӣ Назарзода Н. Н. аз хобгоҳҳои №2 ва №6 боздид ба амал оварда, бо донишҷӯёни ин хобгоҳҳо суҳбати озоду самимӣ анҷом доданд. Сипас, муовини ректор оид ба корҳои тарбиявӣ Назарзода Н. Н. ба хотири беҳтар намудани вазъи санитарию гигиении ҳуҷраҳои истиқоматӣ ба донишҷӯён тавсияҳои муфид дода, хоҳиш ба амал овард, ки ба тозагиву озодагии ҷойи истиқоматии худ диққати аввалиндараҷа диҳанд. Ҳамчунин ба комендатҳои хобгоҳҳо супориш дода шуд, ки дар ҳар як ҳуҷраи истиқоматии донишҷӯён гулҳои сабзи ороишӣ ташкил намоянд.

ҶАЛАСАИ РЕКТОР: МУАЛЛИФОНИ КИТОБҲОИ ДАРСӢ ҚАДРДОНӢ МЕШАВАНД

Имрӯз Аҳлиддин Ибодуллозода, ректори донишгоҳ, бо иштироки муовинони ректор, деканони факултетҳо ва сардорони раёсат ҷаласаи корӣ баргузор намуд. Дар ҷаласа ректори донишгоҳ як қатор масъалаҳои муҳим, аз ҷумла назорат ва муайян намудани донишҷӯёне, ки то ҳол шартномаи таҳсилро пардохт накардаанд, ҳолати ҳозиршавии донишҷӯён ба дарс, баргузор намудани намоиши дастовардҳои факултетҳо дар даромадгоҳи бинои асосӣ, пешниҳоди ихтисоси нав, ташкили суҳбат-вохӯрӣ бо волидони донишҷӯёни курси аввал, ивази бесабаби дарсҳо аз ҷониби омӯзгорон, дарсшиканӣ, таҷрибаомӯзии донишҷӯёни дар курси хатм қарордошта, дастгирии донишҷӯёни ниёзманд, фармоишҳои интиқолу барқарор, иштироки донишҷӯён дар чорабиниҳо ва назорати қатъии донишҷӯёнро дар дарс мавриди баррасӣ қарор дод.