МУЛОҚОТИ ИБОДУЛЛОЗОДА БО ДОКТОРАНТОН АЗ РӮИ ИХТИСОС (PHD)

Имрӯз Аҳлиддин Ибодуллозода, ректори донишгоҳ бо мақсади татбиқ намудани дастуру ҳидоятҳои Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон дар самти рушди маориф ва илм бо докторантон аз рӯи ихтисос (Phd) вохӯрӣ баргузор намуд. Маврид ба ёдоварист, ки дар Донишгоҳи давлатии омӯзгории Тоҷикистон ба номи Садриддин Айнӣ шумораи докторантон 82 нафарро ташкил намуда, дар курсҳои 1-ум, 2-юм ва 3-юм таҳсил менамоянд. Ректори донишгоҳ зимни вохӯрӣ шахсан бо ҳар як докторант суҳбат намуда, доир ба мақолаҳои чопкардаашон ва дар кадом сатҳ қарор доштани рисолаҳои илмияшон пурсон шуда, ба докторантоне, ки дар курси ниҳоӣ қарор доранд, муҳлати мушаххас барои дифои рисолаҳояшон пешбинӣ намуд.

МАҚОМУ  ИФТИХОРИ МО ЗИ ИЛМ АСТ!

Боиси ифтихор аст, ки Донишгоҳи давлатии омӯзгории Тоҷикистон ба номи Садриддин Айнӣ дар сабқати ҷумҳуриявӣ, ки 38 муассисаи таҳсилоти  олии касбии Ҷумҳурии Тоҷикистон ширкат намуданд, дар бахши фанҳои табиатшиносию риёзӣ дар ҷумҳурӣ ба мақоми 2-юм  сазовор дониста шуда, аз ҷониби Вазири маориф ва илми Ҷумҳурии Тоҷикистон бо ифтихорнома ва як адад принтери замонавӣ қадрдонӣ карда шуд.

Соли ҷорӣ даври хотимавии олимпиадаи ҷумҳуриявӣ бахшида ба 35 солагии Истиқлоли давлатии Ҷумҳурии Тоҷикистон миёни донишҷӯёни муассисаҳои таҳсилоти олии касбӣ таҳти унвони «Аниси кунҷи танҳоӣ китоб аст...»  дар Донишгоҳи байналмилалии сайёҳӣ ва соҳибкории Тоҷикистон доир гардид.

ИТТИҲОДУ ЯКДИЛӢ АЗ ВАҲДАТ АСТ

18-уми июни соли 2022 дар Донишгоҳи давлатии омӯзгории Тоҷикистон ба номи Садриддин Айнӣ ҷиҳати таҷлили Рӯзи Ваҳдати миллӣ конфронси илмӣ-назариявии ҷумҳуриявӣ дар мавзӯи “Ваҳдати миллӣ – кафили субот ва рушди ҷомеаи Тоҷикистон” доир гардид.

Ҳамоиши илмиро Абдусалом Мирзозода, муовини ректор оид ба корҳои таълимӣ ифтитоҳ намуда, зимнан иброз намуд, ки Ваҳдати миллӣ, беҳтарин неъмат, орзуву ормон, таҳкими давлатдорӣ, наҷоти миллат, рушду нумуъ ва ҳастии инсон дар ҳар давру замон ба шумор меравад. Мавсуф ҳамзамон ёдрас кард, ки Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон дар ин маврид чунин таъкид намудаанд: “Созишномаи сулҳ барои сарзамини аҷдодии мо субботу оромии воқеиро таъмин кард, ваҳдати миллиро ба вуҷуд овард ва зиндагиеро фароҳам сохт, ки онро ҳар фарди покдилу некхоҳи мамлакат дер боз интизор буд”.

ТОЗАГИВУ ПОКИЗАГӢ ҲУСНИ ОМӮЗГОР АСТ

Субҳи 18-уми июн дар асоси дастури ректори донишгоҳ баҳри ободониву покизагӣ ҳашари дастаҷамъонаи омӯзгорон дар гирду атрофи Донишгоҳи давлатии омӯзгории Тоҷикистон ба номи Садриддин Айнӣ баргузор гардид. Дар шанбегӣ ҳайати раёсат, омӯзгорон ва кормандони донишгоҳ иштирок намуданд ва гирду атрофи биноҳои таълимӣ ба тартиб оварда, алафҳои хушкида ва ҳалқагулҳои атрофи донишгоҳро тозаву озода карданд.

ҶАЛАСАИ СИТОД: МАСЪУЛИН, ШАФФОФИЯТИ БАРГУЗОРИИ ИМТИҲОНРО ВАЙРОН НАКУНЕД!

Аҳлиддин Ибодуллозода зимни баргузории ҷаласаи ситоди назди ректори донишгоҳ дар толори Шӯрои олимон ба омӯзгорон, деканон, муовинони декан ва коргузорону методистон дастур дод, ки назоратро дар самти раванди таълим пурзур намуда, шаффофияти баргузории имтиҳонот, аз ҷумла имтиҳони шакли таҳсили фосилавиро таъмин намоянд.

РЕКТОР: ДОНИШҶӮЁНИ ҒОЛИБИ ОЛИМПИАДАИ ҶУМҲУРИЯВӢ ҚАДРДОНӢ МЕШАВАНД

Имрӯз Аҳлиддин Ибодуллозода, ректори донишгоҳ бо донишҷӯёне, ки дар даври ҷамъбастии озмун (олимпиада)-и ҷумҳуриявӣ миёни донишҷӯёни муассисаҳои таҳсилоти олии касбии кишвар иштирок намуда, донишгоҳро муаррифӣ менамоянд, мулоқоти самимона анҷом дод.

Маврид ба зикр аст, ки дар даври ҷамъбастии озмуни мазкур аз Донишгоҳи давлатии омӯзгории Тоҷикистон ба номи С. Айнӣ 14 нафар донишҷӯ аз рӯи фанҳои таълимии забон ва адабиёти тоҷик, забони англисӣ, забони русӣ, таърихи халқи тоҷик, фалсафа, сиёсатшиносӣ, педагогикаи умумӣ, назарияи иқтисодӣ, математика, физика, химия, информатика, биология-экология ва географияи иқтисодии Тоҷикистон бо асосҳои демографӣ, ки санаҳои 17-18 июни соли ҷорӣ дар Донишгоҳи байналмилалии сайёҳӣ ва соҳибкории Тоҷикистон баргузор мегардад, ширкат менамоянд. 

ҒОЛИБИЯТИ УСТОДОНУ ДОНИШҶӮЁН ДАР ДАВРИ НОҲИЯВИИ ОЗМУН

16-уми июни соли 2022 дар муассисаи таҳсилоти миёнаи умумии №10-и ноҳияи Исмоили Сомонӣ даври ноҳиявии озмуни ҷумҳуриявии “Фурӯғи субҳи доноӣ китоб аст” ҷамъбаст гардид. Нахуст, раиси ноҳияи Исмоили Сомонӣ муҳтарам Самӣ Шариф Ҳамид баромад намуда, қайд кард, ки озмуни мазкур аз тарафи Пешвои миллат муҳтарам Эмомалӣ Раҳмон бо мақсади баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ ва таҳкими эҳсоси худогоҳиву хушдшиносӣ миёни қишрҳои мухталифи ҷомеа ба роҳ монда шудааст.